Rastriya Poshan Maah hman ṭan a ni

Sorkar laipuia Ministry of Women & Child Development buatsaihin nimin khan ram chhungah Rastriya Poshan Maah (National Nutrition Month) hman ṭan a ni a, September thla chhung zawng hman tur niin, Mizoramah pawh hman ṭan a ni.

Rastriya Poshan Maah hi a hawnna inkhawm buatsaih tum ni mah se, Covid-19 lêng vangin buatsaih theih a ni lo a; Women & Child Development department kaihhruaiin Mizoram district 11-a ICDS project 27-ah hripui léng laka himna tur ngaihtuah chung leh ‘Digitization' hmang ṭangkai chungin tun thla chhungin hman zui a ni dawn a, sorkar department dangte an thawhpui bawk ang.

Poshan Maah chhung hian nu leh naupang tana chaw ṭha (nutrition) chungchanga zirtirna chi hrang hrang te, naupangte'n an taksa mamawh ang chaw ṭha an an hmuh theih nan leh chaw ṭha ei ṭhat tâwk loh vanga harsatna thleng theihte kawng chi hrang hrangin puanzar an tum a ni.

Rastriya Poshan Maah chhunga hmalakna tura an duante chu - naupang ṭhanṭhu leh chak lo zualte zawn chhuah, nutri-garden siam, nautête nu hnute hnêktir chungchang inzirtir, chaw dang pek chungchang, tui thianghlim, faina leh thianghlimna chungchang inzir leh, article inziahsiak buatsaihte a ni.