Mizoramah zenghri danna pek tur naupang 1,08,702 vel an awm

National Immunization Day 2024 pualin Health & Family Welfare department chuan nimin khan Tanhrila Health & Wellness Sub-Centre-ah naupang kum 5 hnuai lamte hnena zenghri danna pek beihpui thlakna (Intensified Pulse Polio Immunization) an buatsaih a, National Health Mission mission director Dr Eric Zomawia'n a hawng. Mizoramah naupang kum 5 hnuailam 1,08,702 vel zeng hri danna pek tura ruahman a ni.

Dr Eric Zomawia chuan, India ram chu March 14, 2014 khan zenghri natna awm tawh lohna ramah puan a nih tawh thu sawiin, "Zenghri natna awm tawh lohna (Polio free) kan ni tawh chung hian kan ṭhenawm ramahte he natna hi a la awm avangin he hridanna hi kan ram chhungah pek chhunzawm zel a ṭul," a ti.

He hunah hian Health department hnuaia thawktute bakah Tanhril khawtlang hruaitute leh mipuite an tel a, naupang kum 5 hnuailam kalkhawmte zingah zenghri danna (Oral Polio Vaccine) hi pek ṭan nghal a ni.

National Immunization Day hi Mizoram hmun hrang hrangah nimin zing aṭang khan kalpui ṭan a ni a; ni thum chhung awh tur niin, kuminah hian Mizoramah naupang kum 5 hnuailam 1,08,702 vel zeng hri danna pek tura ruahman a ni. Nimin bikah khan hri danna pekna hmun bik (IPPI booth) 1,400 chuang siam a ni a, Health department chuan naupang kum 5 hnuailam zawng zawngte zenghri danna (OPV) hi laktir vek turin nu leh pa leh mipui zawng zawng a ngen.

Nimin vek khan district hrang hrangah National Immunisation Day hi hawn niin, naupang kum 5 hnuai lamte hnena zenghri danna pek beihpui thlakna (intensified pulse polio immunisation) kalpui ṭan a ni a; naupang kum 5 hnuai lamte hnenah zenghri danna pek a ni.

Lunglei district bawrhsap Ramdinliani chuan National Immunization Day puala naupang kum 5 hnuai lamte hnena zenghri danna pek beihpui thlakna a hawng a; nu leh pate chu naupang kum 5 hnuai lamte kim taka hri danna laktir vek turin a ngen.

Lunglei district-ah hian naupang kum 5 hnuai lam zenghri danna pek tur 14,917 an awm a, hri danna pekna hmun (booth) 235 siam a ni. Nimin (Booth day)-a report zawng zawng hi CMO Officer hnenah pek vek tur a ni a, vawiin aṭangin in tinah lut chhuak (house to house coverage)-in hei danna pek leh tur a ni.

Kolasibah chuan Diakkawnah district bawrhsap John LT Sanga'n a hawng a; "Fate an hrisel chuan in chhung boruak a nuam ṭhin, " tiin, tu leh fate an damloh changa damdawi-in pan vat ṭhin turin kalkhawmte a chah.

Kolasib district-ah hian zenghri danna pek tur naupang 8,389 an awm a; nimin khan Kolasid district chhung khaw hrang hrangah hri danna pekna hmun (booth) 122, transit pahnih leh high risk area (HRA) pakua siam niin, nimina pek bâkte chu vawiin aṭang khian in tinah lut chhuakin pek chhunzawm a ni ang.