Kolasib district-ah cooperative society 97 awm

Kolasib District Cooperative Development Committee (DCDC) chuan an chairman John LT Sanga, district bawrhsap hoin nimin khan DC conference hall-ah cooperative society-te hmasawnna tur an sawiho a; Kolasib district-ah cooperative society din leh inziak lut 97 an awm mek thu tarlan a ni.

Kolasib DCDC convener Lalthlamuana, district cooperative officer ni bawk tarlan danin, Kolasib district chhungah sector hrang hrang 15-ah cooperative society din leh inziak lut 97 an awm mek a; cooperative society-te zingah primary agriculture cooperative credit society (PACS) anga kal, member-te hnena sum pûktir thei tura bank ang deuha kalpui ṭhin paruk an awm. PACS hi Mizoram chhungah 73 a awm mek a ni.

Ṭhutkhawmah hian Ministry of Cooperation-in PACS-te tana inkaihhruaina (common bye-law) nei tura a tih bawhzuia, Mizoram Registrar of Cooperative Societies (RCS)-in inkaihhruaina Mizo ṭawnga lehlin a lo thawn chu Kolasib district-a PACS paruk leh inziak lut thar apiangte hmantir zel ni se, an ti.

Pradhan Mantri Bhartiya Janaushadhi Pariyojana (PMBJP) hnuaia damdawi zawrh phalna dil tura cooperative society panga thlan chungchang te, Pradhan Mantri Kisan Samridhi Kendra (PMKSK) hnuaia lei ṭha zawrh dil tura cooperative society pariat thlan chungchang te, ran vulh leh sangha khawi lama tui mite'n PACS an din belh zel theihna tura hmalakna chungchang te, National Cooperative Data Base-a cooperative society-te dinhmun tharlam thun luh zung zung a nih theih nana hmalaknate leh hmasawnna tur thil pawimawh hrang hrangte sawiho a ni bawk.