Aadhaar chungchang inhrilhfiahna buatsaih : Mizoram mipui 90.61%-in Aadhaar card an nei

Unique Identification Authority of India (UIDAI) Regional Office, Guwahati bultumin nimin khan Aijal Club-ah Aadhaar chungchang inhrilhfiahna, State Level Workshop neih a ni a, DPAR secretary R Lalramnghaka'n a hmanpui.

R Lalramnghaka chuan, sorkar hnuaia hamṭhatna hrang hrang dawng thei turin Aadhaar enrollment tih a ngaih thu a sawi a, "Enrolment a tam thei ang berin an tih theih nan Aadhaar Enrolment Drive pawh theihtawpa kalpui a ni ṭhin a, Aadhaar neitute'n Direct Benefit Transfer (DBT) kaltlangin hamṭhatna leh ṭanpuina an dawn theih nan Aadhaar leh bank account thlunzawm a ni a, mipuite pawhin ṭanpuina hi dik tak leh awlsam takin an dawn theih phah," a ti.

He hunah hian Aadhaar chungchanga hriattur pawimawhte thupui hrang hrang hmangin mithiamte'n an sawifiah bakah, zawhna leh chhanna hun hman a ni .

Workshop-a tarlan danin, tun dinhmunah Mizorama mihring awm zat aṭanga Aadhaar enrolment ti zawng zawng hi 90.61% niin, centrally sponsored schemes (CSS) 63-te chu Aadhaar kaltlanga ṭanpuina pek ṭhin a ni. Empowering Residents, Direct Benefit Transfer (DBT), Good Governance, Aadhaar Enabled Payment System (AePS), Proliferation of Digital Financial Services leh Foundational Layer to India Stack-te hi Aadhaar nena inngheng leh inthlunzawm vek an ni.