IIHR-in hnathawh ṭhat vangin mi pahnih award hlan

6th March, 2024

Institute of Horticultural Research (IIHR), Hesaraghatta Lake Post, Bangalore chuan nimin khan KVK Khawzawla senior scientist Dr Malsawmkimi hnenah 'Award of Excellence for Promotion and Spread of ICAR- IIHR Technologies' leh NB Sanga Chhangte, Rabung hnenah 'Best Farmer Award' an hlan. Award hi IIHR, Bengaluru-ah Proj. Sanjay Kumar Singh, ICAR (Horti Science), New Delhi-a deputy director general ni bawk chuan a hlan a ni.

Sorkar thuchhuah tarlan danin, Dr Malsawmkimi hi IIHR Technology-te kut hnathawktute hnena hlan chhawn kawngah a thawhṭhat avangin chawimawina hi hlan a ni a; NB Sanga Chhangte hi hlawhtling taka Tomato Arka Samrat a chìn avangin award hi pek a ni bawk. Dr Malsawmkimi hi Mizorama KVK thawktu zingah IIHR award dawng hmasa ber a ni.

Dr Malsawmkimi kaihhruaina hnuaiah KVK Khawzawl hian fur laia Mizoramin tomato a chìn ve theih loh chhante zirchian a ni tawh a, kum 2015 khan on farm trial-ah Introduction of Triple Resistance Variety Arka Rakshak chu hlawhtling takin Tuipui khuaa Vanlalmuana huanah a lo en chhinpui tawh bakah, natna leh rannung laka thlai ven dante a zirtir a ni. Kum 2018 khan Tualteah Arka Abhed leh Samrat-te IIHR aṭanga la chhoin, ṭhalai kut hnathawktute a kaihruai hmasaa, hei hian midangte pawh a tih hmuh chho zel a ni.

KVK Khawzawl hian IIHR variety tomato bakah, dawnfawh variety - Arka Shyam & Arka Muthu-te, bean variety - Arka Anoop & Arka Suvidha leh long bean Arka Mangala, bawkbawn variety – Arka Harshita pawh hlawhtling takin kut hnathawktute lo/huanah a lo en chhinpui tawh bawk.

Best Farmer Award dawngtu NB Sanga Chhangte, Rabung hian kum 2017 aṭang khan Tomato Arka Samrat chíng ṭanin, KVK Scientist-te'n thil pawimawhte an zirtir a; Rabung khuaah hian a chíng hmasa ber niin, tunah hian Rabung khuaah tomato chíngtu in 40 vel an awm tawh.

NB Sanga hian kum 2023 khan tomato a thar aṭangin Rs 8,00,000 a lei chhuak a; Best Farmer Award hi Tualte khuaa TC Lalliantluanga leh Lalsangzuala te chuan KVK Khawzawl kaltlangin an lo dawng tawh bawk a ni.