AH&Vety Minister-in hnathawh a en

AH&Vety minister Dr K Beichhua chuan nimin khan Veterinary Polyclinic Hospital, Khatla a tlawh a, thawktute hnathawh dan a en.

Polytechnic Hospital seminar hall-a officer-te nen an inkawmnaah Dr K Beichhua chuan, an hnathawh dan leh hmalaknate chu chhuan­awm a tih thu sawiin, "In ṭhahnemngaihna leh thawhhona ṭha tak hi a lawmawm hle," a ti a; sa, bawnghnute leh artuia Mizoram intodelh theih nan theihtawp chhuah zel turin a chah.

AH&Vety Minister chuan, Covid-19 léng karah saa Mizoram intodelh lohzia a lan thu sawiin, "Mizo mipuite'n tun hma aia chak zawka ṭan kan lak a pawimawh. Mi kuta innghat loin, keimahni ngeiin kan thawh chhuah a ngai a ni," a ti.

Dr K Beichhua chuan, MNF an sorkar hnuah veterinary dispensary paruk chu veterinary hospital-ah hlankai a nih tawh thu te, rural animal health centre (RAH) 35 chu dispensary-ah hlankai tawh a nih thu te, district pasarih - Lunglei, Siaha, Lawngtlai, Champhai, Kolasib, Serchhip leh Mamitahte veterinary hospital sak hna thawh mek a nih thute a sawi bawk.