Covid-19: Mizoram dinhmun Niminah mi 21 chhuahtir

August 31, Thawh-ṭanni khan ZMC-a swab sample 862 leh Lunglei Civil Hospital-a sample 24 endik zingah Covid-19 vei hmuh chhuah a ni lo a; nimin khan Vairengte checkgate-ah Rapid Antigen Test (RAT) hmangin mi pakhat hmuh chhuah a ni thung. Nimin vêk khan hripui vei zinga dam tawh mi 21 chhuahtir an ni.

Thu dawn danin, ZMC laboratory-a swab sample endik 862 zinga 851 chu Aizawl district-a mi an ni a, an zinga tam ber chu contact tracing tihna aṭanga sample lâkte niin, Covid-19 vei hmuh chhuah an awm lo. Nimina Vairengtea mi 491-te swab sample endik zinga hripui vei hmuh chhuah chu hnam dang a ni.

Nimin khan Mizorama hripui veite enkawlna hmun pali aṭangin mi 21, civil mi vek chhuahtir an ni a, mipa 11 leh hmeichhia 10 an ni. Lawngtlai CCC aṭangin hmeichhia pathum, Zobawk, Lunglei CCC aṭangin mipa panga, Lunglei Pukpuia SIRD CCC aṭangin mipa pakhat leh, Aizawl ITI CCC aṭangin mi 12 (mipa panga leh hmeichhia pasarih an chhuak a ni.

Mizoramah Covid-19 vei mi 1,012 hmuh chhuah a ni tawh a, chu'ng zinga mi 610 (60.22%) chhuak tawhin, mi 402 (39.78%) an la chhuak lo. La chhuahtir loh zingah hripui vei tawh lo (negative tawh) eng emaw zat an awm nia thu dawn a ni.

Vairengteah nimin tlai dar 5 thleng khan sample 11,069 endik tawh aṭangin Covid-19 vei mi 103 hmuh chhuah a ni a, a tam ber hnam dang niin, Mizo pahnih an tel.