Mau chi atan cheng nuai 648.16 seng: Kan mau neihte hman ṭangkai kan tum - Horticulture Minister

Horticulture minister Prof. Lalnilawma chuan nimin Assembly Session-ah mau chi buaipuina atan cheng nuai 648.16 sen a nih thu leh Mizorama mau neih mekte hman ṭangkai tum a nih thu House a hrilh.

BJP member Dr K Beichhua zawhna kal zela zawh belhnate chhangin Horticulture Minister chuan, "National Bamboo Mission hnuaiah mau chi phun zat chu 9,10,725 a ni. Hmun ṭhenkhatah chuan a nun ṭhat laiin, kan mau phunna hmunin a zir loh vangte pawh a nimaithei, a phunna hmunpui ber Hmunpui leh a chhevelah chuan 70% vel dam khaw chhuaka ngaih a ni. Mau chi buaipuina atan hian cheng nuai 648.16 sen ral a ni," a ti.

Horticulture Minister chuan Mizorama maute hman ṭangkaina tur em em hriat a nih rih loh thu sawiin, "Kan mau neih mekte hi hman ṭangkai dan kan zir chho mek. Hmanni lawk khan Taiwan-ahte officer ṭhenkhatte nen kan zin. Project-te siamin hmalak tum mek a ni," a ti a, mau chi thar ni lo, Mizorama mau neih mekte hman ṭangkai tum a nih thu a sawi.

Mizorama mau neihte ethanol siamna atana rawn hmang duhte an awm thu sawiin Prof. Lalnilawma chuan, "UK base company-te pawh kan mau aṭanga ethanol siam chhuak turin investment rawn tih an duh a, thutlukna siam a la ni lo. Bamboo charcoal aṭanga fiber siam te pawh ngaihtuahnaah a awm. Engtiang chiahin nge kan mau hman ṭangkai kawngah kan kal dawn tihah chuan sorkarin thutlukna a la siam ang," a ti.

Horticulture Minister sawi danin, tun din­hmunah Horticulture depart­ment hnuaiah mau chìnna khua Hmunpui ram chhung, Saiphai zau leh Hmunpui khaw bulahte bamboo link road laih niin, a laihna atan cheng nuai 105 sen a ni.