Thingtlangah training kalpui a ni dawn; Field siam mekte zauh dan kan ngaihtuah - Sports Minister

Nimin Assembly Session-ah Sports minister Lalnghinglova Hmar chuan April, 2024 aṭangin thingtlangah training kalpui ṭan a nih dawn thu leh, football field siam mekte chu a têt hlawm avangin tih zauh dan an ngaihtuah thu House a hrilh.

Member hrang hrangte zawhna chhangin Lalnghinglova Hmar chuan, Aizawl khawpuia Smart City sum hmanga field siam mekte chuan international standard an phâk loh thu sawiin, "Sum sen a tam si a, national standard pawh tling loa siam hi a uihawm. Kan enkual a, a theih dan ang anga tizau turin hnathawktute kan hrilh," a ti.

Sports Minister sawi danin, football field hi FIFA duh dan chuan metre 105 x 68 tur a ni a, international standard size chu metre 100 x 64 a ni.

Edenthar Venga field siam mek chu metre 45 x 90 a ni a, a senso tur chu cheng vbc. 8.8 a ni. Chite Venga siam mek chu metre 100 x 52 a ni a, a senso tur chu cheng vbc. 8.9 a ni. Cheng vbc. 6.81 senna tur Hlimen Venga siam mek chu metre 45 x 90 niin, Tuivamita siam mek pawh 45 x 90 a ni.

Hetihlai hian Keifangah cheng vbc. 5.38 international standard size leh Lengpuiah cheng vbc. 5 sengin FIFA duh dan anga zaua siam a ni thung.

April 1, 2024 aṭangin thingtlang kilkhawrah training kalpui a nih dawn thu sawiin Lalnghinglova Hmar chuan, "Coach-te a ṭangkai thei ang bera hman kan tum a, anmahni nen pawh meeting kan nei tawh. Thingtlang kilkhawr thlen kan duh a, a duh tan a dil theih. An dila hmun danga coaching an kalpui lai a nih loh chuan kan kaltir zel ang," a ti.

Sports Minister chuan, sports infrastructure chu sum neih chuan din belh a ṭhat thu sawiin, "Chutihrualin, state sorkar tumve tur chi-ah chuan kan insûm hret ang. Hmun dang aṭanga kan pawisa ngai loa tih theih a awm chuan kan ti ang. Kan insûm rih hret dawn," a ti a, infrastructure awm sa hman ṭangkai tumin theihtawp an chhuah dawn thu a sawi.