Mumal zawka agriculture marketing kalpuina tur buatsaih mek a ni - Agriculture Minister

ZPM member W Chhuan­awma zawhna chhangin Agriculture minister PC Vanlal­ruata chuan, mumal zawka agriculture marketing kalpuina tur buatsaih mek a nih thu nimin Assembly Session-ah House a hrilh.

Agriculture Minister chuan, sorkar chuan agriculture marketing mumal zawka kalpui a nih theihna atan Mizoram milin Agriculture Produce & Livestock Marketing (Promotion & Facilitation) Model Act, 2017 leh Contract Farming & Services (Promotion & Facilitation) Model Act, 2018 a buatsaih mek thu a sawi.

PC Vanlalruata sawi danin, model act pahnihte hi peihfel a nih hmaa hman turin council of ministers chuan February 5, 2024 khan Operational Guidelines for Agriculture Market Assurance Fund (AMAF) a pawm lailâwk tawh a ni.

Hun eng emaw chen aṭang tawh khan scheme remchang apianga farm mechanization phâk ang tâwk tâwkin kalpui ve ṭhin a nih thu sawiin Agriculture Minister chuan, "Kum 2014-15 aṭang khan central sorkara Ministry of Agriculture, Mechanization & Technology Division hnuaiah Mission mode-in kalpui ṭan a ni," a ti.

PC Vanlalruata chuan, sorkar laipuiin Sub Mission on Agricultural Mechanization (SMAM) scheme a siam thu sawiin, "Chumi kaihhruaina zul­zui chuan Mizoram sorkara Agri­culture department chuan kum tinin annual action plan a siam ṭhin," a ti a, SMAM aṭanga fund hmuhte hmang hian Mizorama loneitute hnenah loneihna atana ṭangkai tur khawl leh hmanraw hrang hrang lei nan subsidy pek ṭhin a nih thu a sawi.

INC member C Ngun­lianchunga zawhna Agriculture Minister-in a chhan danin, sawhthing, hmunphiah, aieng leh hmarchate chu farmer association/society, farmers producer organization/self help group/primary agricultural credit societies (PACS)-te kaltlangin collection centre store house ruat bik aṭangin lei a ni dawn.

Tun sorkarin thlai thar lei tur chi li a puan sawhthing, hmunphiah, aieng leh hmarchate lei hma hian Agricultural Market Assurance Fund Management Board kaltlangin Mizorama thlai thar minimum support price turte uluk takin a zir chiang anga, a zir chian hnuah a man turte chu a bituk ang.