Regular loa nursing course zir lo turin ngen

Mizoram Nursing Council (MNC) chuan post basic B.SC Nursing leh M.Sc. Nursing course-te regular lo (distance education)-a zir lo turin an chah a, regular loa zir chu dan phal loh a nih thu a tarlang.

MNC chuan Mizo ṭhalai tam takin nursing zirna an bawh nasat thu leh Mizoram bakah state dangahte pawh ṭhahnem takin an zirchhuak tawh tih tarlangin, "India ramah hian nursing zirna hi Indian Nursing Council (INC) hnuaia awm niin, syllabus leh regulation pawh uluk taka duan a ni. Hei hi India ram chhunga nursing zirna zawng zawngte zàwm vek tura tih an ni a, INC hnuaia nursing zirnaah hian regular/formal (theory & practical) a zir vek tur a ni," an ti a, post basic B.Sc. nursing course bik chu INC approved IGNOU Study Centre hnuaiah a zir theih thu an tarlang.

MNC tarlan danin, Mizo ṭhalai, state danga nursing zir, a bikin post basic B.Sc. Nursing leh M.Sc. Nursing course zingah regular loa distance education (i.e. correspondence or in non-attending mode) a zir lui an la awm tih hriat a ni. Hei hi INC Guidelines kalh tlat a nih avangin Mizoram Nursing Council chuan a ngaimawh hle.

State dang aṭanga nursing course zir chhuak, MNC-a in ziaklut tur emaw, additional qualification certificate dilte pawh fimkhur takin endik ṭhin a ni tawh. Regular loa zirte hi danin a phal loh avangin MNC hnuaiah inziahluh theih a ni lo.