Smart class hmanrua tur sem

Nimin khan Mamit DC conference hall-ah 'Hands on Training and Distribution of Smart Classroom (K-Yan) Programme' buatsaih a ni a, bawrhsap Dr Lalrozama'n hmanpuiin, bungrua a sem nghal.

Dr Lalrozama chuan, an district-a middle school-te tana smart class kalpuina tur hmuh a ni ta chu lawmawm a tih thu sawiin, "Project-in a tum ang taka naupangte'n an zirlaiah phûrna nei a, pawl sawn ringawt ni loa thiamna tak tak neia tunlai technology hmanga khawpui zawka zirlaite ûm phâk tura zirna pek a ni a, khawvel ram changkang zawkte'n zirna an kalpui dan an hmuh phaka chhawpsak an ni tur hian zirlaiteah hmasawnna an pek ka beisei," a ti.

SDC Beitlotha Nohro sawi danin, Rural Electrification Corporation Ltd. CSR Education Project kal zelah education project hnuaiah Smart Classroom (K-YAN) Project duan a ni. Project hnuaiah khawl 20 lei a ni a, cheng nuai 49 ruahhman a ni. K-YAN kháwl hi audio-visual learning aid a ni a, CBSE learning module a chhawm tel. Smart classroom kalpuina atan middle school 20 thlan a ni.