Siahaah International Women's Day hmang

Siaha District Legal Services Authority bultumin nimin khan MADC Forest Hall-ah 'International Women's Day' hman a ni a, DLSA secretary Lalhriatpuii'n a hmanpui.

Lalhriatpuii chuan, Legal Aid Clinic hnuaiah ukil ràwn theih reng an nih thu a sawi a, "Sum leh pai sèn ngai loa thubuai remna ṭha tak, Lok Adalat chu ṭangkai zawka chhawr a nih theih nan ṭan i la thar ang u. A bik takin kut inthlak, ṭawngkam chhiaa invo leh a dangahte thubuai thehluh theih reng a ni. Lok Adalat hi sum leh pai sèn ngai lo a nih piah lamah councelling ṭha tak pek ṭhin a nih avangin a ṭangkai hle," a ti a, Lok Adalat chu venhmina ṭha tak pek tel a nih bawk avangin pan hreh lo turin kalkhawmte a sawm.

Court kal hi thil nuam lo tak, amaherawh chu thil ṭha zawk thleng tura thil pawimawh ni si a nih thu sawiin Lalhriatpuii chuan, "Serivce provider-te'n a ṭul apiang tiin, Court-ah an kalpui thei a, Siahaah chuan MCHP Branch tin secretary-te hi service provider an ni a, pan theih reng an ni. Juvenile Justice Act hnuaiah Juvenile Justice Board- ṭha tak a awm a, observation home-ah naupang kum 18 hnuai lam thil tisualte chu enkawl ṭhin an ni," a ti.

International Women's Day hi kum tin March 8-ah hman ṭhin a ni a, kumina thupui chu 'Inspire Inclusion' tih a ni. March 8, 2024 hian Siahaa kût lian leh pawimawh tak 'Lyuva Khutla' hman a nih dawn avangin nimin khan 'International Women's Day' hi hman a ni.