Indiaskills Competition-a tel tur mi 16 thlang

Labour, Employment, Skill Development & Entrepreneurship (LESDE) department buatsaih, ni hnih awh State Level Skills Competition-2024 chu nimin khan LESDE Auditorium-ah khar a ni a; Mizoram aiawha national level competition-a tel tur mi 16 thlanchhuah an ni.

Kharna inkhawmah hian LESDE addl. secretary K Lalhmingliana chuan, "Skills hmangin kan ram leh hnam hi nasa takin kan chawikang thei. Ṭhalaiteah Skill Development lama harhtharna a thleng zel a, heng avang hian kan ITI-a zir duhte pawh seat an inchan vek lo ṭhin. Lehkha kan zir rualin thiamthil zirna lam kan ngaih pawimawh a ṭul hle a ni," a ti.

LESDE director Angela Zothanpuii tarlan danin, khawvela skills lama intihsiakna lian ber Worldskills Competition 2024 (Skills Olympic), Lyon, France-a neih tura India aiawh tur thlanna, Indiaskills Competition-a tel turin March 5-6, 2024 khan state aiawh intihsiakna neih a ni a, mi 47 zingah Mizoram aiawh turin mi 16 thlan an ni.

He'ng mi 16 thlanchhuahte hi thla khat chhung an trade ṭheuhah chher hriam belh an ni ang a, kumin April thla tawp lama national competition awm turah Mizoram aiawhin an chhuak ang.

Indiaskills Competition-ah hian Mizoram hi kum 2022 aṭang khan a tel ve ṭan a, a tel hmasak berah hian Shoe Making-ah Gold Medal leh Floristry-ah Silver Medal a dawng a ni.