Consumer Awareness Campaign

Administrative Training Institute (ATI) leh Mizoram Consumers' Union, Aizawl ṭangkawp chuan nimni khan New Siaha MYA Multipurpose Hall-ah 'Consumer Awareness Campaign' an buatsaih a, additional DC Lalnunmawii'n a hmanpui.

Lalnunmawii chuan, Siaha district-a consumer-ten an dikna chanvo an hriat chian a ṭul thu a sawi a, "Awareness neih ṭhat tâwk loh vang nge complaint lam a awm tam lo hle a, hei hian zawhna lian tak a siam a ni. Complaint tur a lo awm lo a nih chuan thil lawmawm tak a ni a, chutih rualin a nachang hriat loh vang a nih erawh chuan mipuite'n hmabak kan la ngah dawn hle," a ti.

District Consumers' Union-te'n theihtawp an chhuah nia a hriat thu sawiin Lalnunmawii chuan, "Mipuite'n thil lei leh hralhah eng dikna nge an neih a, eng mawhphurna nge an neih tih an hriatchian a pawimawh," a ti a, training-a telte chu midangte zirtir chhawngtu ni ṭheuh turin a sawm.

He hunah hian MCU vice president C Laldawngliana chuan consumer chungchang, consumer-te dikna leh chanvo, consumer-te mawhphurhna, Consumer Protection Act 2019, Consumer Dispute Redressal, complaint chungchanga hriattur, dan bawhchhiatna leh hremna bakah, thupui dang hrang hrangte a sawifiah a; zawhna leh chhanna hun hman a ni bawk.