Sorkar hriatpui loin hna thawhtir

Nimin Assembly Session-ah Sports minister Lalnghinglova Hmar chuan Chawnhu field, Lawngtlai district-a hnathawh chu sorkarin a hriatpui loh thu House a hrilh.

INC member C Ngun­lianchunga, Lawngtlai West bialtu MLA zawhna chhangin Sports Minister chuan, "Chawnhu field-ah Mizoram State Sports Council-in kutthlakna a nei lo. Agreement a awm lo a, ṭawngka-a sawipui an awm tawh em ka hre lo. Ziakin sorkarah thil tih engmah a awm lo. Hnathawktute an awm tawh a nih pawhin, sorkar nen thuthlung engmah neih a ni lo,' a ti.

C Ngunlianchunga chuan, minister kalta khan YLA-te a thawhtir tih sawiin, "Sports dept. AE pawh phone-in ka bia. An thawhtira, pawisa an pe ta lo. YLA hruaitute an mangang, an khawl hman sakte'n an dil an dil. Sports dept. anga engmah hriatpui a nih si loh chuan a va manganthlak dawn ve," a ti a, an hnathawh tawhna man engtin emaw ngaihtuahsak turin Sports Minister a ngen.

Sports Minister chuan a ziaka awm lo, sorkar dan anga thuthlung inremna awm loa hna thawh chu engtin nge kalpui zel a nih dawn a sawi theih rih loh thu sawiin; C Ngunlianchunga chu hrethiam rih turin a ngen.