Vairengteah saphu kâwr man

Vairengtea Excise & Narcotics dept. checkgate-a duty-te chuan maxi cab (sumo) ML 1/0B - 6858 aṭangin March 5, Thawhlehni zing khan saphu kâwr kg. 98 an hmu chhuak a; saphu kâwr leh sumo khalhtu hi Environment, Forest & Climate Change department, Kolasib Division hnenah an hlan.

Thudawn danin, sumo khalhtu chu Danial-a, Cachar niin, Shillong leh Aizawl inkarah a service ṭhin. Daniel-a chuan a thil phurhte hi Happy Valley, Shillong-a sumo counter aṭanga phurh tir a nih thu sawiin, "Counter nghaktute'n vawksa rêp tia sawiin, Aizawl sumo counter-a dah turin min hrilh," a ti.

Driver chuan a hmain a ṭhianten bumin zu an phurh tir tawh tih sawiin, "Aizawlah court a ngaih vanga bungruate rawn phur chho ka ni. Saphu kâwr bakah bungraw dang sofa nen Rs. 6,000 hlawh turin ka phur," a ti a, bungrua a phurh hrim hrim a en ngai loh thu a sawi.

Forest deptartment-a thawkte sawi danin, saphu kâwr hi kg. khat Rs. 35,000 vela hralh ṭhin a ni.