LS MP-in OIL hotute a kâwm
Lok Sabha MP C Lalrosanga chuan October 5, Thawhṭanni khan Noida-ah Oil India Ltd chairman leh managing director Sushil Chandra Mishra leh hotu dangte a hmu a, Mizorama oil leh gas zawn hna thawk chhunzawm zel turin a ngen.
Mizoramah ruahtui a tam avang leh tlang ram hmun chhengchhia a nih avangin oil leh gas zawngtute'n harsatna tâwk ṭhin mah se, zawn hna chhunzawm zel a ṭul thu sawiin C Lalrosanga chuan, Oil India-in Mizorama hmun pali an verh tawhah an duh ang hmu rih lo mah se, hmun dangahte zawng zel turin a ngen a ni. A ṭul angin sorkar laipui leh Mizoram sorkarah hmalakpui a inhuam thu a hrilh bawk.
Sushil Chandra Mishra chuan, Mizoram chhim lamah pawh oil zawn hna thawh an chhunzawm an tum thu Lok Sabha MP a hrilh a ni.
Oil India hotute sawi danin, Mizorama district pali-ah sq.km. 3,213-ah tuialhthei zawn hna an thawk tawh a, chu'ngte chu - Keifang, Aibawk, Thenzawl leh Phulmawiahte a ni. Kawng awm dan azirin Pangzawl ramah oil zawngin lei verh chhunzawm an tum bawk.