KHAWTHLIR

EVM endik

Lok Sabha MP inthlanpui, 2024-a Kolasib district tana electronic voting machine (EVM) hman tur 25 (control unit 20 leh ballot unit 5) lo thlen belhte chu nimin khan Kolasib DC conference hall-ah EVM siamtu Electronics Corporation of India Limited (ECIL) engineer pahnih hoin endik thawh khatna neih a ni a; election official-te leh political party hrang hrang aiawhte an tel.

Meth man

March 5, Thawhlehni khan Assam Rifles leh Hnahlan Police ṭangkawp chuan Hnahlanah TK Khupa, Champhai nia inchhal hnen aṭangin methamphetamine tablet 7,500, cheng vbc. 2.25 man hua chhût an man. TK Khupa lakah hian Hnahlan Police-te'n thubuai an ziaklut.

Zirtirna buatsaih

Lungleia Arts & Culture auditorium-ah nimin khan State Institute of Rural Development & Panchayati Raj, Mizoram buatsaihin Lunglei district-a thingtlang khaw 12-a tuihna humhalhna kalpui mekte pualin Localization Sustainable Development Goals (water Sufficient Village) chungchang zirtirna neih a ni a; Lunglei Chief Medical Office hnuaia thawkte'n natna inkaichhawn theih loh (non-communicable diseases) chungchang an zirtir nghal bawk.

Awareness Campaign

Jawahar Navodaya Vidyalayas (JNV), Thenzawla zirtirtu leh zirlaite chuan March 5, 2024 khan Pace Setting Activities hnuaiah Hygiene Awareness Campaign an hmang a; faina leh hriselna kawnga hmasawn nan Thenzawl khawchhunga chhungkaw harsa zualte hnenah bawlhhlawh bawm, hmunphiah, harpic leh hmanraw dangte bakah, fai tura inzirtirna lehkha an sem.

Vawk vulh training

Mamit district Agricultural Technology Management Agency (ATMA) chuan nimin aṭang khan New West Phailengah ni sarih awh tur 'Capacity building program on Piggery Rearing and Management' an buatsaih a; training-ah hian self help group hrang hrang aṭangin member 40 an tel a ni.