KHAWTHLIR

President hlui Pranab Mukherjee chu August 31, 2020 tlaia a thih avangin, Mizoram sor­karin a sún mek. President hlui zahna lantirna atan Mizoram sorkar chuan August 31 aṭanga September 6 thleng sûnna hun 'State Mourning' a nei dawn a; hemi hun chhung hian sorkar in hrang hrangah hnam puanzar a ngul chanvea zàr a ni ang a, sorkar angin intihhlimna lam chi reng reng buatsaih a ni lo bawk ang.

Nimina Assembly session-ah speaker Lalrinliana Sailo chuan tun ṭum session-a Panel of Chairman atan BJP member Dr Buddha Dhan Chakma, ZPM member Lalchhuanthanga leh MNF member H Biakzauva te ruat an nih thu a puang. Panel of Chairman-te hi Speaker leh Deputy Speaker an awm remchan loh chánga session kaihruaitu tur an ni.

State Referral Hospital (ZMC)-ah Covid-19 vei vangin mi 73 enkawl mek a ni a, niminah dah luh belh an awm lo. Mi 73 zinga 72 chu Isolation Ward-ah an awm a, SICU-ah pakhat a awm. SRH-ZMC Bulletin tarlan danin, ward-a awm zinga pakhat a khua a sik a, ngaihtuah­awm erawh a ni lo.

E-in-C pension 

PWD engineer-in-chief K Lalsawmvela chu August 31, 2020 khan superanuation pension-in a chhuak a, E-in-C thar Henry Lalmuankima hnenah August 31 khan mawhphurhna a hlân.

Chief minister Zoramthanga chuan August thlaa a hlawhpui (basic pay) aṭanga 60% - Rs. 48,000 chu Covid-19 dona atan nimin khan  Chief Minister's Relief Fund-ah a chhûng lut. Nimin thleng khan CM Relief Fund-ah cheng vbc. 20.86 a lut tawh a, cheng vbc. 19.33 hman tawh a ni.

Aizawl District Magis­trate chuan, Aizawl Venglai leh Zemabawk chu September 1, 2020 aṭangin tiam chin awm loin containment area-ah a puang. Containment area a nihna hlih a nih hma chuan medical duty, security duty leh Aizawl DC-in phalna a pek ni lote tan luh leh chhuah phal a ni lo a, kawngpuia tlân tlang erawh chu phal a ni.