Doctor-te'n thingtlanga awm an duh lo; ZMC a mite an graduate hunah kan zia ang - Health Minister

Health minister Lalrinpuii chuan nimin Assembly Session-ah doctor lâk thar turte'n thingtlangah awm an duh loh thu sawiin, "Zoram Medical College (ZMC) a mite an rawn graduate hunah kan zia ang," a ti.

Zawhna hrang hrangte chhangin Health Minister chuan, medical officer lâk a nih dawnin a nghet a nih dawn loh chuan lâk tur an hmu zo lo ṭhin tih a sawi a, "National Health Mission hnuaiah pawisa a'n awmve pawhin thingtlanga awm an duh lo," a ti a, ZMC-a MBBS batch hmasa berte an graduate hunah indaih lohna a zia deuh tur thu a sawi.

Health Minister sawi danin, ZMC-a MBBS batch hmasa berte hi April, 2024 tawpah an chhuak dawn. MBBS zirlaite hian bond an sign vek a, kum hnih chhung tal sorkarah an thawh a ngai dawn.

MLA inthlan dawnah PHC pasarih chu CHC-ah hlankai an nih thu sawiin Health Minister chuan, "Sorkar hmasa thil tih a ni a, tih hlawhtlin thuai thuai a chakawm khawp mai. Chutihrualin, indaih lohna avangin a nih tur angin a function thei rih lo. Kan indaih hunah a nih tur ang taka function tir a ni ang," a ti.

Lalrinpuii chuan, sorkar hmasain health care scheme corpus fund atan Asian Development Bank-ah cheng vbc. 1,000 an biak fel thu sawiin, "Hei hi bawhzui reng a ni. Hmanni lawk pawhin health care lam buaipuitu Delhi-ah a kal," a ti a, June, 2024-ah agreement ziak tura inbiak fel a nih thu a sawi.

Health Minister sawi danin, Mizoram khaw hrang hranga sorkar hmasain health clinic hawn tura a ruahman khaw ṭhenkhatte chu zirchian mek a ni.

Intra Uterine Insemination tih theihna tur laboratory ruahmanna a awm a, IVF leh ICSI erawh a awm lo. Kum 2020-2024 chhungin Mizoram sorkarin IVF tihna atan MR bill leh health care bill-ah cheng nuai 169.97 a seng tawh.