Siaha district-ah poppy chìnna hmun tichhia

Siaha district-a Khaikhy ram chhung, Myanmar ramri bulah March 6, Nilaini khan ruihhlo (opium) siamna, poppy chìnna hmun hmuhchhuah niin, Siaha district-a sorkar thuneitute leh tlawmngai pawlte'n an tichhe nghal.

Mizoram Police tarlan danin, Mizorama a hmasa ber atan March 6, Nilaini khan Siaha district-a Khaikhy ram chhungah Lungpuk khaw mite'n dan loa poppy chinna hmun hi an hmuchhuak a; hemi ni vêk hian Phura Police Station-a thawktute, Lungpuk khuaa 20th Assam Rifles te, Mara Thyutlia Py, Lungpuk branch leh MADC hnuaia Forest department aiawhte a hmunah kal nghalin, he'ng poppy-te hi an tichhe nghal vek a ni.

Poppy an tihchhiat hi cheng nuai 32 man hu vel nia chhût niin, poppy chinna hmun huan neitu hi zawn mek a ni a; Mizoram Police chuan Lungpuk khaw mite bengvarna leh chetdan avanga an lawmthu an tarlang bawk.