CSS Hindi teacher 1,305 la vek turin MPCC-in sorkar an phût

Congress party chuan, CSS hnuaia Hindi zirtirtu 665 lâk turah, a hmaa lo thawk tawh mi 1,305 aṭanga hnawhkhat tur leh, 665 chauh ni loin, mi 1,305-te chu la leh vek turin Mizoram sorkar an phût.

MPCC chuan thu­chhuah siamin, School Education department-in CSS hnuaia Hindi teacher 665 lakna tur advertisement a chhuah chu lawmawm an tih thu an tarlang a, "Kum tam tak lo thawk tawh CSS Hindi teacher 1,305-te kha MNF hotute'n kum 2018 MLA election dawna an campaign auhlaa an intiam ang ngeiin, mi 665 chauh la loin, an zavaia la vek turin sorkar kan phût a ni," an ti.

Congress party tarlan danin, February 23, 2017-ah khatih laia MNF vice president Dr R Lalthang­liana'n Mizo Hnam Rûna chanchinbumite a kawmnaah, 'CSS hnuaia rawih reng reng sorkar laipuiin an rawih hun chhung chu hlawh zawng zawng an tumsak tur a ni a, chumi ral hnuah chuan state sorkarin budget aṭangin a rawih chhunzawm tur a ni,' a ti a; MNF an sorkar hunah CSS hnuaia Hindi teacher 1,305-te chu an lâk leh vek tur thu a sawi. Chu thu vêk chu MLA Lalruatkima'n Assembly House-ah March 29, 2017 khan a sawi bawk.

March 1, 2017-a MNF party-in press release an siamah, CSS Hindi teacher 1,305-te an lainat thu an tarlang a, CM-in MNF president Zoramthanga chu a nihna kian ngamin, Education Minister-in Dr R Lalthangliana chu a nihna kian ngam bawk se, thla ruk ral hmain CSS Hindi teacher-te harsatna an chinfel ngei tur thu an tarlang.

Congress party chuan, CSS Hindi teacher-te chu vote zawnna atan chauha hmang lo tur leh, an chung­changa an lo sawi tawhte chu tipui­­tling ngei turin MNF kaih­­hruai sorkar an phût a ni.