Vairengte - Aizawl kawng dinhmun sawifiah

Nimin Assembly Session-ah PWD minister Vanlalhlana chuan member-te zawhna chhangin, Vairengte - Aizawl kawng dinhmun leh enkawl a nih dan a sawifiah.

PWD Minister chuan Vairengte - Bilkhawthlir inkar kawng chu NHIDCL enkawl a nih avangin Mizoram PWD-in a hriatpui em em loh thu a sawi a, "Bilkhawthlir - Kolasib kawng chu Mizoram PWD enkawl a ni a, an hnuaiah Sadguru Pvt. Ltd. enkawltir an ni. Anni hian April 2, 2024 thleng an enkawl dawn a, a repair hna an thawh thuai kan beisei," a ti.

Kolasib - Kawnpui kawng chu NHIDCL enkawl a nih thu sawiin Vanlalhlana chuan, "Kawnpui - Khamrang hi Mizoram PWD enkawl a ni a, repair hna thawh theih thuai tum a ni. Khamrang - Buichali chu kum 2021 khan NHIDCL kutah hlan a ni tawh a, hlan a nih hma hian Mizoram PWD chuan M/S Ratna Infrastructure Pvt. Ltd. a enkawl tir," a ti a, M/S Ratna-te hian an enkawl ṭhat loh avangin an deposit hmanga NHIDCL kawng siam hna thawh tir tum a nih thu a sawi.

PWD Minister chuan, Buichali - Sairang chu NHIDCL enkawl a nih avangin hriat an nei tam lo tih sawiin, "Sairang - Aizawl chu PWD enkawl a ni a, a chhe lai siamṭhat tum mek a ni," a ti.

Midang enkawlah pawh kawng a chhiat chuan sorkar a che tho tih sawiin Vanlalhlana chuan, "Sum awm ang angin a chhelai apiang fur huna harsatna min thlen lohna atan siam zel a ni," a ti a, furah harsatna tawh a nih lohna atan theihtawp an chhuah mek thu a sawi.

PWD Minister sawi danin, Vairengte - Sairang inkar kawng four lane-a siam turin NHIDCL lam chu an inpeih vek tawh a, contractor pawh an thlang fel tawh. Mah se, forest clearance a la fel loh avangin hna ṭan theih a ni lo, a fel huna hna ṭan turin NHIDCL chu an inpeih tawh.