JERC member atan Benjamin L Tlumtea lalut
Sorkar laipuia Cabinet Minister for Power, New & Renewable Energy RK Singh chuan nimin khan video conferencing kaltlangin Mizoram state aiawha Joint Electricity Regulatory Commission for Manipur & Mizoram member tura ruat thar Benjamin L Tlumtea chu rinawmna thu thiamtirin a lalut.
Joint Electricity Regulatory Commission for Manipur & Mizoramah hian Mizoram leh Manipur state aiawh member pakhat ve ve awmin, chairperson hi kum tin an inthlak ṭhin a; tunah hian Manipur state aiawh R Thanga chu chairperson a ni mek a ni.
Electricity Regulatory Commission hi Ministry of Power hnuaia statutory body (quasi-judicial) niin, electricity kaihhnawih tinrengah state-a thuneitu sang ber a ni a; Electricity Act, Rules, Standard of Performance a kenkawh bakah, regulations leh Tariff te tichhuakin Manipur leh Mizoram state tan a thawk mek a ni.
JERC for Manipur & Mizoram hi Electricity Act, 2003 dan hnuaiah Ministry of Power leh, Manipur leh Mizoram sorkar aiawhte'n memorandum of agreement siamin kum 20 chhung atan July 24, 2008 khan an din a, inremna a tawp hnuah chuan state pahnih tan a hran ve vea din a ṭul dawn a ni.