Dan phal loha sangha man lai social media-a pholangte um zui zel

Fisheries director thar Laltleipuii chuan nimin khan a pisaah thuthar thehdarhtute a kawm a; dan phal loha sangha man lai social media-a pholangte chu umzui nghal zel ṭhin thu a sawi.

Laltleipuii chuan, Mizoram Fisheries Act in a tum ber chu Mizoram luidung awmze nei leh hlawh zawka hman ṭangkai a nih thu a sawiin a, "Luidunga sangha an rêm loh nan venhim a ni a, sangha fuan hun laia venhimte, an chereu loh nana man phal lohna leh dan hnuaia man phalna hmun siam hmangin mipui zirtir leh dan phal loha sangha man chingte man chhuah leh a ṭul anga dan anga hremte a huam. Tunhnaia social media lama lo lang, Mizoram chhim lama bomb tam tak hmanga sangha man pawh chhui zui mek a ni," a ti a; dan phal loha sangha man lai social media-a pholangte chu umzui nghal zel ṭhin thu a sawi.

Fisheries Director chuan, sangha thar chhuah tamna Mamit leh Kolasib district lama sangha khawitute chuan an dil hmunah hnamdang an khâr tir ṭhin avangin Mizoram tharchhuah tam tak chu state ṭhenawmah a chhuak ve thung tih a sawi a; "Department hmalaknain sangha khawitute'n sangha dil siam dan dik tak aṭanga sangha khawi dan, sangha chi thar chhuah leh enkawl dan mumal an zir theihna turin NEC aṭangin DPR cheng vbc. 20 thehluh a ni a, hei hi pawm a ni," a ti a, partial harvesting emaw, angling hmang emawin sangha man runpui kalpui chhoh zel tum a nih thu a sawi.

Fisheries Director tarlan ṭhenkhat

☑ Sorkar kum tharah department inrelbawlna turin cheng nuai 1101.43 dah ni a, kumhlui aia a tamna chu cheng nuai 45.91 a ni.

☑ Fisheries department hmalakna hi Centrally Sponsored Scheme-a innghat a ni.

☑ Fisheries department hnuaiah thawktu 178 awm turah mi 99 an awm mek a, post ruak 79 a awm.

☑ Mizoramin sangha a lakluh tam ber chu Andra Pradesh state aṭanga lo lut a ni.

☑ Andra Pradesh aṭanga Mizorama lo thleng turin kar 2-3 vel a ngai a, Mizoram a rawn thlen chuan a chakna a hloh nasa tawh ṭhin.

☑ State pawn aṭanga sangha lakluh zingah sangha vawnṭhatna turin Aizawl hmun ṭhenkhatah formalin sulhnu hmuh a ni a, amaherawhchu, mihring tana pawitham a ni lo.

☑ Mizoramah sangha dil hectare 5,759 a zau siam a ni tawh.

☑ Kum khat chhungin sangha tharchhuah hi quintal 50,298.50 anga chhût a ni a, sangha dil nei hi mi 18,519 awm anga chhût a ni.

☑ Mizorama sangha thar chhuahin mamawh tawk a phuhruk loh avangin state dang aṭanga lakluh a tam.