Gas home delivery kalpui zel a ni - FCSCA Minister

Food Civil Supplies & Consumer Affairs (FCSCA) minister B Lalchhanzova chuan MNF member Ramthanmawia zawhna chhangin, eirawngbawlna gas home delivery kalpui zel a nih thu House a hrilh.

B Lalchhanzova chuan, gas home delivery hi AMC huam chhung leh district khawpuiahte kalpui mek a nih thu sawiin, "Hei hi a ṭul anga rampuma kalpui theih turin ruahmanna siam tum mek zel a ni. AMC huam chhung leh district headquarter huam chhungah pawh hian veng zawng zawngah kalpui theih a la ni lo. A chhan ber pawh mipui lam la inpeih tawk loh vang leh tuna kalpui mek dan (point delivery)-a la lungawi zawk an la tam hle," a ti.

FCSCA Minister chuan home delivery hi sem dan tur dik tak a nih thu inhrilh chhoin, hmalak chhoh zel a nih thu a sawi a, "Veng eng emaw zatah home delivery hi kalpui tawh a ni a, mimal ang phei chuan veng hrang hrangah home delivery tura booking-ti te hnenah pek zel a ni tawh," a ti a, Aizawl veng ṭhenkhatah department-a thawktuten home delivery duhtute ko khawmin online booking sawifiahna leh zirtirna an neih thu a sawi bawk.