LADC CEM-in banna thehlut

Lai Autonomous District Council (LADC) chief executive member (CEM) V Zirsanga chuan nimin khan CEM aṭanga banna LADC Chairman hnenah a thehlut.

CEM V Zirsanga kaihhruai MNF sorkar rin tawk lohna motion a luh avangin nimin khan special session koh a ni a, special session-ah hian floor test hmanga V Zirsanga'n sorkarna thlawp tura thlawptu a ngah tawk leh tawk loh floor test hmanga neih tura ruahman a ni. V Zirsanga'n banna a thehluh tak avangin floor test nei loin session hi an titawp.

LADC-ah hian elected MDC 25 awmin, MNF MDC pakua, BJP, INC, ZPM leh independent MDC pakhat ṭheuh, an vaiin MDC 13-te'n Governor hnenah V Zirsanga chuan thlawptu a nei ngah tawk tawh lo tih an thlen a ni.

Governor ruahmanna angin LADC Chairman chuan V Zirsanga’n sorkarna siam turin thlawptu a neih ngah tawk leh tawk loh hre turin special session hi a ko a ni.

V Zirsanga kaihhruai sorkar hi November 2020 khan a piang. LADC inthlan hnuhnung bera vote tlate chu November 8, 2020 khan chhiar a ni a, MNF-in seat 20 lain sorkarna an siam.