KHAWTHLIR

KṬP-in thisen pe

KṬP, Phunchawng Branch chuan nimin khan an kohhran hall-ah Synod Hospital blood bank tan thisen unit 13 an pe a, petute mipa 11 leh hmeichhia pahnih an ni.

Pakhat cancel

MNF member Robert Romawia Royte zawhna chhangin PWD minister Vanlalhlana chuan, kum 2018-a sorkar a tawpa sorkar thar a lo pian khan PWD hnuaia sorkar hmasain tender hmanga dan ang thlapa contractor a lo thlan tawh hna pakhat cancel a nih thu House a hrilh.

Tla hlum

Nimin chhun dar 12:30 vel khan Lalpeklawma (37) h/o Laltlangmawii, Maubawk Veng, Aizawl chu an in bul zawngṭah kungah a lawn laiin, zawngṭah kung hi bungin a tla. Lalpeklawma hi a hliam tuar loin chetsualna hmunah hian a thi a, vawiinah vui a ni ang.

Tang turin hrem

Champhai District Special Judge (ND&PS Act) Liansangzuala chuan March 6, Nilaini khan heroin avanga man Rosiamliana, Zokhawthar chu kum 10 chhung jail tang tur leh cheng nuai 1 chawi turin a hrem a, pawisa hi a pe thei lo a nih chuan thla 6 dang a tan belh ang. Champhai Police-te chuan March 16, 2021 khan Rosiamliana hnen aṭang hian heroin gram 391 manin, thubuai an siamsak a ni.

Ganja man

Excise & Narcotics department chuan March 6, Nilaini zan khan Kawlbem ram, Saitual district-ah Khualdokap (44) s/o Khamzathang, Tiddim district, Myanmar nia inchhal hnen aṭangin ganja kg. 112 an man. Khualdokap hi The Narcotics Drugs & Psychotropic Substances Act, 1985 tlawhchhanin thubuai siamsak a ni a, nimin khan Special Court (ND&PS Act), Aizawl-ah hruai nghal a ni.

In ṭhiahsak

National Highway (NH)-54 kawngpui sial hna thawhna tura Lunglei district Ṭhualṭhu khuaa an chenna hmun tihchhiat ngai avanga zangnadawmna pek tawh leh, an chenna hmun chhuahsan tura hriattirna dawng tawh zinga chhuak duh lo mi palite chu nimin khan Lunglei district-a sorkar hotute'n an chenna in an ṭhiahsak.

Silaimu man 

Assam Rifles-te chuan March 5, 2024 khan Sangau, Lawngtlai district-ah C Vanlalpeka (34), Sangau-II nia inchhal khalh lirthei (tata sumo) aṭangin sniper rifle 30-6 mu 3,000 leh rifle-scope 10 an man a, police hnenah an hlan.