LC tharte pualin training buatsaih

Aizawl Municipal Corporation (AMC) chuan nimin khan Vanapa Hall-ah Aizawla local council member thlan tharte pualin training an buatsaih a, vawiinah an chhunzawm ang.

LC training-a khuallian PC Lal­hmingthanga, AMC mayor chuan, LC member-te leh AMC hnuaia thawktute chu hnathawh inang an nih thu leh LC-in harsatna an tawh chuan AMC harsatna tawh a ni nghal tih a sawi a, "Municipal dang angin AMC hian thuneihna sang tak a nei lo chungin sorkarin subject a pek chinte chu ṭha takin a thawk thei zel a ni," a ti.

PC Lalhmingthanga chuan, "Local council hi pawl dang emaw, sorkar department dang pawhin an duh duha an lo hman ṭangkai a rem lo a, AMC remtihna a ngai ṭhin a ni," a ti a; LC member-te chu an term - kum nga chhung ṭhahnemngai taka thawk tur leh, veng bil rilru pu lo a, Aizawl rilru pu fo turin a chah. 

Training-ah hian AMC commissioner K Laldingliana'n AMC leh LC chungchanga thil pawimawh chi hrang hrang a sawifiah a; sawihona hun hman a nih bakah, zawhna leh chhanna hunte hman a ni.

Local council member atana thlan tharte hi Covid-19 vanga sorkar kaihhruaina angin ṭum khatah mi 50 zel AMC koin training a neihpui ṭhin a ni.