Assam ramri buaipui turin ZPM-in MNF sorkar an phût

ZPM party chuan nimin khan thuchhuah siamin, MNF kaihhruai Mizoram sorkar chu MLA pakhat ringawt buaipui lo a, ramri buai leh Mizoram chhunga ngaiha Assam mite'n in an sakte chu buaipui zawk turin an chah.

ZPM tarlan danin, Vai­rengte leh Lailapur inkara ramri buai laiah Assam Forest department-in kum 2019 khan in an thawm ṭha a, chu chu duh loin July 6, 2019 khan Mizo eng emaw zatin an dang tawh a ni. Buaina lian zawk a chhuah loh nan a hmunah Kolasib SP leh Cachar DFO-te an inbia a, Cachar DFO chuan in thawm ṭhat hna chu chawlhsan a remti a; chumi hnuah Mizo IR sipai 30 chu Vairengte gate aṭanga metre 30 vela hláah dah an ni a, Assam lamin police an dah ve bawk.

Kum 2019-a buaina tenau chhuah tawhna, Assam lamin in an thawm ṭhat chu tun hnaiah Assam Forest department luah mai theih turin an chei ṭha tih sawiin ZPM chuan, "Mizoram sorkar hian a hre lo nge, a dang ngam lo? Heng bakah hian Assam lamin dispute area-ah in 28 lai sain an luah thar bawk. Kan Chief Minister-in ramri chinfel dan thuruk, amah chauhin a hriat kha tun hi a hman hun tak a ni lo'm ni?" an ti.

ZPM chuan, Assam lamin ramri-ah Mizoram an nêk zel laiin, chief minister Zoramthanga leh a hote chuan ramri ngaihtuah loin, mipui thlan tlin MLA pakhat paih leh bàn theih dan tur ringawt an buaipui niin an sawi a; MLA pakhat bàn dan tur ringawt buaipui lo a, ramri ngaihvena buaipui turin MIzoram sorkar hotute an phût a ni.