2015-a polytechnic leh ITI building sak zawh loh leh hman ṭangkai loh a tam - Chief Minister

Nimin Assembly Session-ah chief minister Lalduhoma chuan kum 2015-a MSDP scheme aṭanga ITI leh polytechnic building tur sak ṭan, la zawh loh leh hman ṭangkai loh a tam thu a sawi.

Tuichawng bialtu MLA Rasik Mohan Chakma chuan, kum 2015-a MSDP scheme kaltlanga Chawngtea ITI leh polytechnic building leh quarter tur an sak chu enkawltu tumah an awm loh thu leh a chhiat nual tawh thu sawiin, department-in a hriatpui leh pui loh chungchangah Labour Employement, Skills De­ve­lopment & Entre­preneurship (LESDE) Minister a zawt a ni.

LESDE minister Lalnghinglova Hmar chuan, LESDE suma sak leh enkawl a nih loh thu sawiin, "Kan zin remchànah kan en ang a, a kalpui zel dan turah ruahmanna siam a ni ang," a ti.

Hemi chungchangah hian Chief Minister chuan, MSDP scheme aṭanga ITI leh polyte­chnic building sak hna zawh loh a tam thu sawiin, "Sorkar hmasa lamah PAC chairman ka nihve laiin kan tlawh chhuak deuh vek. Department hotute kam khatin, contractor-te kan hau," a ti a, theih­tawp an chhuah thu a sawi.

Lalduhoma chuan sorkar aṭanga tum tak takna a awm loh chuan thil tih a sâwt loh thu sawiin, "PAC aṭanga recom­men­dation siamin a thawk thui lo, hna a thawk thui thei lo," a ti.

Chief Minister sawi danin, Zoteah eng emaw chen an sa zo a, kawng khar an ru a, wiring-te pawh chah niin, a panna kawng a chhe leh tawh. Hetihlai hian a bulah building dang an sa leh mek. Tlangsamah sak zawh tawh, eng atan maha hman loh a awm. Chhiahtlangah an la zo lo, hun an pawtsei zel, an zo thei lo.

ITI leh polytechnic chu entre­preneur-te mamawh ngawih ngawih a nih laiin hna a chak loa, a buai tih sawiin Chief Minister chuan, "Kan endik leh ang a, contractor ho kan terminate mai dawn nge, en zui ngai a awm a ni," a ti.