RUSA asst. professor-te nawr tlangpui ngei tum

INC member C Ngunlianchunga zawhna chhangin Higher & Technical Education (HTE) minister Dr Vanlalthlana chuan, RUSA hnuaia lak assistant professor-te dah ngheh an nih theihna tur chu nawr tlangpui ngei a tum thu a sawi.

C Ngunlianchunga chuan, MPSC-in kum 2019-a RUSA hnuaia asst. profe­ssor a lakte chu state sorkarin an term a tawp huna dah ngheh a tiam thu sawiin, "Dah ngheh hi Council of Minister pawhin an pawm thlap. An term hi October 31, 2021 khan a tawp tawh. Tuna kan minis­ter hi an tana lo au chhuak tawh ṭhin a nih angin, dah ngheh theih an ni dawn em," tiin a zawt a ni.

HTE Minister chuan asst. professor-te chu dah ngheh tuma hmalak a nih thu sawiin, "Dah ngheh hleih theih lohin an awm. Ngaihtuah ngai tak a ni. Finance leh DPAR nente pawh kan ngaihtuah ho tawh. A hmaa ka lo sawisak, aupui tawh an nih avangin nawr tlang­pui ngei ka tum," a ti.

Dr Vanlalthlana chuan asst. professor chung­changah hian Chief Minister pawh hmu tawhin, a ni pawhin a lo ngaih pawimawh thu a sawi.