Mizo ṭhalaite training-na atan cheng vbc. 31 chuang sanction; Ṭhalai thawn chhuah dan anga kalpui duh

Nimin Assembly Session-ah Labour, Employment, Skill Development and Entrepreneurship (LESDE) minister Lalnghinglova chuan sorkar laipuiin Mizo ṭhalaite training-na atan cheng vbc. 31 chuang central-in an sanction thu leh ṭhalaite thawnchhuah dan anga kalpui an duh thu a sawi.

Lalnghinglova Hmar chuan, Skills Ministry-ah special package an dil thu sawiin, "Ministry lamin skill development-ah hmuh tur in vâng, kan sawiho dawn nia an ti. A hnuah kan kal leh a, Mizoram State Special Project kan thehlut. Ṭhalai 10,220 training theihna tur sum cheng vbc. 31 chuang min sanction sak tawh," a ti.

Mizoram aṭanga ram pawna hnathawka chhuak an tam chu lawmawm tih thu sawiin LESDE Minister chuan, "Chhungkaw tam tak eizawnna a ni a, sum ṭhahnem tak an lalut. Pawimawh ta chu a tir chhuak tute an ni a, engtin nge an tirh chhuah tihte zirchian a ngai," a ti a, ram pawna hnathawk tura kal mi tam takin harsatna an tawh thu a sawi.

LESDE Minister chuan, mi tam takin harsatna an tawh tihreh theih a ṭhat thu sawiin, "Home dept.-ah kan kutken mai dawn em ni tiin lehkha kan ziak tawh. Kan phût chu dan ang thlapin, hnathawktute an him tur a ni. Ṭhalaite kan tirhin, sorkar emaw, a hnuaia mite hriatpuina a nih loh chuan thil fel lo a awmin a buai dan kan hre tawh. Dan anga kalpui kan duh hle. MYC pawhin hman an la zel," a ti.

Lalnghinglova Hmar chuan tunhnaia Japan rama Mizo ṭhalaite tirhchhuah chu sorkar hmasa hmalakna a nih thu sawiin, "Term hmasa-ah tuna Leader of Opposition kaihhruaina hnuaiah ṭha takin hma an la a, a chungah ka lawm hle. A aia lianin Japan rama ṭhalai tirh hi kalpui zel kan tum," a ti a, Japan ram aṭangin company pathum an rawn zin mek thu a sawi.