International Women's Day hman a ni

Khawvel puma hmeichhiate ni, International Women’s Day chu nimin khan Mizoramah pawh hman niin, Women & Child Development (WCD) department, State Legal Services Committee leh International Women’s Day (IWD) Organizing Committee-te hmalaknain Vanapa Hall aṭanga Aijal Club Park thleng International Women's Day Parade neih a ni. Kumin IWD thupui (theme) atan 'Count Her In: Invest in Women: Accelerate Progress' tih hman a ni a, campaign thupui chu 'Inspire Inclusion' tih a ni bawk.

 International Women's Day hmanna pui ber Aizawlah chuan Social Welfare & Tribal Affairs, Women and Child Development minister Lalrinpuii hoin Vanapa Hall-ah hman a ni.

Lalrinpuii chuan, Mizo hmeichhiate'n hma an sawn zel thu a sawi a, "Hmeichhiate chu kan thlen chinah lungawi mai loin, kohhran leh khawtlangahte theihtawpin thawk zel ang u. Mawhphurtute zinga hmasa ber chu nute kan ni a, hmeichhiate dinhmun chàwikàn zel a ṭul. Hmeichhiate chuan hmachhawp pawimawh tak tak kan nei a, he'ng zinga pahnihte chu chhungkaw enkawtu nih leh ram hruaitu atan hmeichhia kan tel zel hi ani," a ti a, hmasawn turin chawl loa ṭan lak zel a ṭul thu a sawi.

International Women’s Day pual hian kum tina tih ṭhin angin Ministry of Women& Child Development kaihhruaina siam zulzuiin kar khat chhung (March 1-8, 2024) nitin IWD pualin hun hman a ni. Vanapa Hall-a hun hmannaah hian SWTA&WCD minister Lalrinpuii chu khuallian niin, Guwahati High Court judge Justice Marli Vankung chu khualzahawm a ni a; khuallian leh khualzahawm bakah, Padma Shree awardee B Sangkhumi-te'n thu an sawi.

He hunah hian Cabinet minister Lalrinpuii, MLA pahnih Prova Chakma leh Baryl Vanneihsangi Tlau bakah, social worker & entrepreneur Lalthangpuii Sailo (Biate), Lalrinmawii (Thakthing) leh Nunherdangzeli (Baktawng)-te hnenah IWD pualin chawimawina hlan a ni.

Indian Christian Women's Movement, Mizoram Unit (ICWM) pawhin nimin vêk khan Millennium Centre kawtzawlah International Women's Day pualin hun an hmang a, MLA Baryl Vanneihsangi'n hmanpuiin, "Mahni inchhunga fanute awpbeha an awm chuan khawtlangah mahni inrintawkna an nei thei lo ang," a ti.

Baryl Vanneihsangi chuan, pawl hrang hranga hmeichhiate an tel ve naah a lu ber nihtir kawngah harsa tihna a la awm thu a sawi a, "Chhungkuaah pawh hmeichhiate kan la awp bet deuh ni in a lang a, mahni inchhunga fanute awpbeha an awm chuan khawtlangah mahni inrintawkna an nei thei lo ang, hei hi nu leh pate pawhin kan fanute chunga kan rilru put hmang kan siam danglam a ngaihna a ni," a ti a, sorkarin Gender Budgeting a siam thu leh hei hi hmeichhiate tana thil pawimawh tak a nih thu a sawi.

Inkhawm tawi hi ICWM president Maria Hmangaihzuali'n a kaihruai a; tuna Mizorama hmeichhe MLA pathumte hnenah lawmpuina hlan a ni.

International Women’s Day hi kum 1911 aṭanga hman ṭan niin, Mizoramah chuan kum 2005 aṭangin hman ṭan a ni.