Health care hi MNF tih chhuah - MNF Adviser

MNF chuan nimin khan an pisa-ah chhung inkhawm an hmang a, thusawitu MNF adviser H Rammawi chuan health care scheme chu Mizoramah MNF tih chhuah a nih thu a sawi.

H Rammawi chuan, health care chu budget aṭanga tih zel dawn chuan a hautak tih sawiin, "India ram state tam takin an tih theih loh a ni. Chuvangin, kan CM khan tih ngei ṭha a ti bawk nen, Asian Develpoment Bank lamah kan ngen ta a, Finance Minister-ah min thawn sak. Clearance min pek hnuah bank lam procedure angin kal a ngai leh a, agreement an sign tawh hnuah cheng vbc. 1,000 an nei dawn tihna a ni. ZPM sorkar hi an vannei dawn hle," a ti.

MNF Adviser chuan Mizoramah political party-a chhum hmin loh MLA an tamin buaina a awm ṭhin nia sawiin, "Kum 1973-ah Pu Ch Chhunga hote kha chhum hmin loh an ni a, MLA 19-in thlak turin hming an ziak. Kum 1978-ah Pu Ṭhena a'n rawn sorkar leh a, chutah pawh chhum hmin loh MLA an tam avangin an tla leh vawng vawng. Pu Denga hoin MNF 1987-ah kan sorkara, chutah pawh chuan chhum hmin loh an tam avangin kum 3 kan kal thei ṭawk a ni," a ti a, inthlan leh hunah chuan MNF an sorkar leh dawn thu a sawi.