Vote thi tam ZPM-in pawi an ti

ZPM elected office bearer te, general secretary-te leh PAC member-te nimina joint meeting chuan resolution pass in, August 27, 2020-a village council leh local council inthlanah ZPM candidate eng emaw zat thlan tlin an ni chu lawmawm an tih thu an tarlan rualin, vote thi a tam lutuk chu inbuatsaihna ṭhat loh vang nia an ngaih thu an tarlang.

ZPM resolution chuan, ZPM chu party thar a nih avangin unit an la sawh nghet lo hle a, chuti chunga mipuiin khua leh veng eng emaw zatah ZPM an thlang tling chu lawmawm an tih thu tarlangin, "Mipuiin ZPM-a rinna an nghahzia lannaah kan ngai," a ti. In­thlan dawn hnaiah PRISM-in an party-in candidate an neih lohna hmunah chuan ZPM candidate-te vote tura mipui an ngen chu lawm­awm an tih thu an sawi.

Mizoram sorkar inbuatsaihna ṭha lo leh felfai lo vangin mipui an chî-âi hlea an hria thu sawiin ZPM chuan, "Inthlan hun tur pangngaiah Covid-19 vangin inthlang thei loa thla thum lai postpone a ni chunga khati taka inpuahchahna ṭha loa inthlanna buatsaih a ni kha MNF sor­karin lal leh thuneihna bâk thil dang an ngaih serious lohzia a lang chiang hleah kan ngai," an ti. "Sorkar inbuatsaihna ṭhat tâwk loh vangin vote thi a tam em em ni-ah kan ngai a, a pawi kan ti," an ti bawk.