AH & Vety Minister-in A-HELP a hawng

AH&Vety minister C Lalsawivunga chuan nimin khan Dawrpui Multipurpose Hall-ah thingtlanga ranvulhtute tana vety services pekna tur, 'Accredited Agent for Health and Extension of Livestock Production (A-HELP)' a hawng a; Mizoramah ranvulha eizawng an tam rualin, anmahni viltu tur Vety mithiamte erawh an indaih loh nasat thu a sawi.

C Lalsawivunga chuan, Mizoramah ranvulha eizawng an tam thu a sawi a, "Anmahni viltu tur Vety mithiamte erawh an indaih lo nasa a, he harsatna hi A-HELP hmalakna hian a rawn phuhru chho zel dawn. A-HELP kaltlang hian AH&Vety department hna pawimawh tak tak - ran damlo enkawl, vaccination, artificial insemination, bank loan buaipui sak, awareness campaign leh animal registration-te chu tih a ni dawn a, department tichaktu pawimawh tak a ni dawn," a ti.

A-HELP hi central level-a Deendayal Antyodaya Yojana-National Rural Livelihoods Mission (DAY-NRLM), Ministry of Rural Development (MoRD) leh Department of Animal Husbandry and Dairying (DAHD), Government of India-te'n September 1, 2021-a thawhhona thuthlung (memorandum of understanding) an ziah aṭanga inṭan a ni a; he hmalakna kaltlang hian DAY-NRLM hnuaia self help group member hmeichhia, Livestock Community Resource Persons (LCRP)-a thlanchhuahte chu ṭangkai taka hman tum an ni.

A-HELP ni thei tur hian DAY-NRLM hnuaia LCRPs ni laimekte chu Master Trainers-te'n a bik taka training hranpa an neihpui a ngai a, Master Trainers turte hi National Dairy Development Board (NDDB), Anand, Gujarat-ah ni ruk training an paltlang hmasak a ngai bawk. He hmalakna hnuaiah hian Mizoram aṭangin Master Trainers tur Vety department aiawh doctor pali leh MzSRLM aiawh mi pahnih thlanchhuahte'n January 22-28, 2024 khan training an paltlang tawh a ni.