MP inthlan atan network/internet sawipui

Lok Sabha Inthlanpui 2024 atana inbuatsaihna kalzelah nimin khan Khawzawl DC meeting hall-ah deputy district election officer Lalfakzuala, addl. DC kaihhruaiin election official-te leh Khawzawl district-a telecom leh internet service provider-te'n tluang taka inthlan neih a nih theih nana thawhho dan tur an sawiho.

Lalfakzuala chuan, mobile network leh internet chak ṭha chu chanchin rang taka inhrilhhriatna, information pekna ṭangkai leh pawimawh ber a nih thu a sawi a, "Hei hi inthlan buatsaih nan a pawimawh em em a ni. Inthlan kalpui dan chu Election Commission of India hmunpui aṭanga hmuh theih turin internet hmanga thawn thlak ṭhin a ni a, inthlan kaihhnawih thil hrang hrangte chu ENCORE Application hmanga upload ṭhin a ni," a ti a; hemi kawngah hian service provider-te thawhpuina ṭha an hmuh a beisei thu leh khaihlak loa network/ internet ṭha tak an pek theih a beisei thu a sawi.

He hunah hian Khawzawl district-a telecom leh internet service provider – Jio, Tawllawt, G-Net, Netsurf aiawhte an tel a ni.