KHAWTHLIR

Resolution pawm

Nimin Assembly Session-ah ZPM member Jeje Lalpekhlua private member resolution putluh, 'Ni 100 chhunga tih hlawh­tlin atana sorkarin a lo duan lâwk, tih hlawhtlin a ni chho zel hi a lawmawm kan ti hle' tih chu sawiho a nih hnuah pawm a ni.

Mi dang kuta hlan tum

Tourism minister Lalrin-puii chuan nimin Assembly Session-ah zawhna chhangin, Thenzawl Golf Course chu enkawl a hautak tih sawiin, "Sum thuni nu a ni ringawt, a inenkawl zo lo viau. Outsource dan ngaihtuah ila kan ti a, Council of Minister-ah chhawpchhuah kan tum," a ti.

Zu man

Mizoram Police-te chuan nimin zing dar 2:30 khan Pukpui, Lunglei daiah Badrul Hussain (24), Assam lirthei khalh bolero pick-up aṭangin sap zu (um puitling) 60 an man a, a handyman Sakir Hussain (18), Assam pawh an man nghal.

Clinic sawiho

Lunglei District Registering Authority (DRA) chu nimin khan additional DC James Miahlung kaihhruaiin a pisaah an ṭhukhawm a; karleh chhung khian Lunglei district-a Clinical Establishment-te endik leh March 22, 2024 khian DRA chuan Lunglei district-a private clinic nei/hawngte sensitization meeting neihpui bakah, permanent/ provisional registration nei loa clinic hawngte laka hmalak dan turte an rêl.

Rorel inkhawm

Mizoram Presbyterian Kohhran Hmeichhe Inkhawmpui Lian rorel inkhawm vawi 12-na chu nizan khan Dawrpui Kohhran Biak-Inah ṭan a ni a, Pathianni zanah a ṭiak ang. Inkhawmpuiah hian thupui chu 'Thih thlenga rinawm' tih a ni a, Synod senior executive secretary Rev. C Zorammawia chu speaker a ni dawn. Vawiinah nilengin rorel a ni ang.

Chawimawina hlan

Mizoram Pradesh Youth Congress Committee leh Mizoram Pradesh Mahila Congress Committee chuan nimin khan Congress Bhavan-ah tun hnaia Delhi khawlaia mi sual zurui silai nena inhrosa, kutlawnga silai chhuhsaktu PC Vanlal-ruati, Delhi Police hnenah chawimawina thuziak leh pawisa an hlan.

CO quarters hawng

Salvation Army, Chanmari West Corps Commanding Officer (CO) Quarters sak thar chu nimin khan Central North Division divisional commander Major K Lalbiaktluanga'n Pathian hnena hlanin a hawng. Salvation Army Chanmari West Corps hi kum 41 chhung Aizawl Bazar CO (Dawrpui) biala an awm hnuah Chanmari West CO bial hi an indang dawn a, Capt. Lalthlamuanzela'n a vawng ang. Quarters hmun hi cheng nuai 44-a lei niin, a sak nan cheng nuai 66 sen a ni.