Article inziahsiak lawmman sem

Central YMA Kuampuan Com­mittee-in veng chhung YMA chanchinbu editor-te puala 'Zirna uar' tih thupui hmanga article inziahsiak a buatsaih result chu nimin khan CYMA Hall-ah an puang a, a ti ṭhate hnenah lawmman an sem.

Kumpuan Committee chairman Lalhmachhuana, CYMA vice presi­dent chuan, hripui léng karah duh anga hmalak theih a nih loh thu sawiin, "Hmalak a harsa em em a ni. A pawimawh ber chu ziaka awm hi a ni a, kumin hian ziaka dah tur leh chhiar turin hma kan la a, article inziahsiak kan buatsaih a ni. Mizoram siamṭhaa tidanglam tur chuan zirna a pawimawh. Jail-a lut tam takte hi lehkha thiam lo kan tihte an ni tlangpui," a ti.

Lalhmachhuana chuan, khua/venga YMA chanchinbu editor, article ziaktute chu ziak zel tura chahin, "Ni tin chanchinbu hrang hrangahte pawh hian ziah uar ni thei se. YMA member, hetiang lama tui mite pawhin ṭhangtharte kan zirtir theihna a nih dawn avangin i ziak zel ang u," a ti a; kum 2021-ah chuan hri léng a ziaawm beiseiin, nasa leh zuala hmalak an tum thu a sawi.

Article inziahsiak ti ṭhate chu - pakhatna R Lalchhanchhuaha, Tlangnuam West Branch, pahnihna Remmuana Chawngthu, Theiriat Branch leh pathumna H Lalsangzuala, Lunglei Rahsi Veng Branch an ni.