HSLC 2024 Examination zawhna chungchang action kan la ngei dawn: Minister

High School Leaving Certificate (HSLC) Examination 2024 neih mekah, social science subject-a zawhna sawisel kái a awm chung­changah action lâk a nih dawn thu School Education minister Dr Vanlalthlana'n a sawi.

Vanglaini palai zawhna chhangin Dr Vanlalthlana chuan, HSLC exam zawhna chungchanga thil thleng chu an ngai thu tak hle tih a sawi a, "School Education department leh MBSE (Mizoram Board of School Education) hotute hnen ṭum hnih meeting kan nei tawh a, kan ngai thu tak hle. Action kan la dawn," a ti.

School Education Minister hian hma an lakna leh hmalak zel dan tur chu vawiin hian Assembly session-ah puan chhuah a tum.

Vanglaini thu dawn danin, March 8, 2024-a HSLC exam zawh tâk SS subject-ah zirtirtu pakhat zawhna siam a chhuak tam bik hle. Kum dang ang thoin zawhna pakhatah chuan zirlaibu páwn lam deuh a chhuak a, chu zawhna chu kumina mi pakhatin zawhna a siam, a chhuak tam bik an tiha siam tho a ni.

Sikul ṭhenkhat chuan HSLC exam zawhna avang hian emergency meeting an ko a, hmalak zel dan tur an rêl nia thu dawn a ni bawk.

MZP chuan, kumina HSLC exam-a SS leh subject danga zawhna sawisel hlawh tak a awm pawi an tih thu sawiin, "Kan ngai thutak hle a, a ṭul anga en zuia hmalak kan tum," an ti.

SS leh subject danga zawhna kalphung felhlel awm leh zawhna hre lâwk an awm anga sawi tur a awm chu ṭha lo an tih tak zet thu sawiin MZP chuan, zirlai rilru thianghlim takte rilru tihnual thei tur thil thleng chu chhui chhuak a, hma la vat turin MBSE hotute an ngen.

HSLC Examination zawhna chungchangah hian Mizo Students' Union (MSU) hruaitute chuan March 9, Inrinni khan MBSE chairman JH Zoremthanga kâwmin, thil awmzia an sawipui.

MSU chuan, thil thleng chu MBSE rin lohna thlen thei a nih thu sawiin, Mizoram zirna tihniam thei leh zirlaite rilru tichhe thei a nih avangin uluk taka chhui chiang a, hrem ngai an awm chuan dan anga hrem ngei turin an phût a ni.

MBSE Chairman chuan, thil awm dan chu MBSE mawhphurhna a nih angin hmalak ngei an tum thu MSU hruaitute a lo hrilh a; March 11, vawiin hian thuneitu sang zawkte nen dan anga hmalak a nih theih nan an inrawnkhawm dawn thu a sawi bawk.