Supply kudam sawn tum a ni

Food, Civil Supplies & Consu­mer Affairs (FCSCA) minister B Lalchhanzova chuan March 9, Inrinni khan Muanna Venga Supply kudam leh FCSCA depart­ment-in Sairanga kudam tur a sak mekte a enfiah a; Muanna Venga Supply kudam chu Sairang Dintharah sawn tuma hmalak mek a nih thu a sawi.

B Lalchhanzova chuan, Muanna Venga Supply kudam chu buhfai metric ton 1,750 dah theihna a nih thu a sawi a; khawpui ṭhang zelah buhfai phurh chungchangah leh sum sensoah a remchan zawk avangin kudam chu Sairang Dinthar lama sawn turin hmalak mek a nih thu sawiin, "Muanna Venga kudam hmun hi chhuahsan a nih hunah sorkarin a humhalh chhunzawm dawn a, ram leh mipui mamawh leh hman ṭangkai ngei tur thil atan hman tum a ni," a ti.

Supply Minister hi Muanna Venga kudama thawkte'n buhfai lak luh dan, dah khawl dan leh phurh chhuah dante an hrilhfiah a; weighbridge hman mek chu hun eng emaw chen hman theih loha a awm tawh hnuah siamṭhata hman mek a nih thu an sawi. Kudama thawm ṭhat ngaite chu ngaih pawimawh hmasaka nei turin Minister chuan FCSCA department hotute a chah.

B Lalchhanzova chuan, Manipur leh Myanmar buaina vangin Mizoramah ráltlân an tam avangin buhfai mamawhna a sang a, chu chuan buhfai man tun hnaiah a nghawng nia an hriat thu a sawi a; buh­fai lak luh chung­changa depart­ment-in theihtawp an chhuah chuan rah ṭha tak a chhuah ngei a rin thu leh, Bharat Rice lak luh dan dap mek a nih thu a sawi bawk.

FCSCA-in Sairang Dinthara kudam thar an sakna tur hmun a tlawhnaah Minister hi bialtu MLA TBC Lalvenchhunga'n a ṭawiawm a; kudam thar sak chu Mizoram tana ro tling a nih ngei theih nan ṭha taka thawk tur leh vil turin contractor leh department hotute a chah.

Sairang Dintharah hian kudam pathum sak tur a ni a; a lian ber, buhfai metric ton 1,500 leng tur chu SASCI sum nuai 830 hmanga sak tur niin, March 28, 2026-ah sak zawh tur a ni. Kudam pahnih dang chu buhfai metric ton 1,000 ve ve lenga sak tur a ni a, NABARD hnuai­a sum hmuh nuai 440 senga sak tur niin, March 31, 2025-a sak zawh tur a ni.

B Lalchhanzova hi FCSCA secretary Zodingpuii leh hotu dangte'n an ṭawiawm a ni.