BCM-in eirûk donaa hmalak an rêl : MPF-a tel a thuphungin an pawm
Baptist Church of Mizoram (BCM) inkhawmpui lian ber, BCM Assembly vawi 128-na, Lunglei Electrric Veng biak-ina neih chuan a thuphungin Mizoram People Forum (MPF)-a tel an pawm a, zir chian a, la ngaihtuah ṭhat leh atan an dah. Mizorama eirûkna hluar lutuk tibo tura hmalak an rêl bawk.
BCM Assembly hi March 7, 2024 khan ṭan a ni a, nizan khan a ṭiak. Nimin khan pastor atan mi pariat nemngheh a ni.
BCM Assembly-ah hian March 8, 2024 khan MPF aṭanga thawkho tura sàwmna chungchang ngaihtuah a ni a; a thuphunga an pawm rualin, BCM hotute zir chian tur leh la ngaihtuah ṭhat leh turin an dah nia thu dawn a ni. BCM website-ah chuan, "Sawihona hun pawh rei tâwk tak hawn a ni a, Assembly palaite pawhin MPF-a tel ve ṭha an ti hle a, uluk leh ngun zawka ngaihtuah ṭhat leh ni se tiin rêl a ni," tia tarlan a ni.
Inkhawmpuiah hian nimin chawhma khan pastor/minister nemngheh inkhawm neih a ni a, BCM president Rev. F Ramdinmawia'n pastor/minister atan mi 15 a nemnghet. Nemngheh zinga mi 12 chu probation hun hmang zo tawh, pastor biala awm tur an ni a, mi dang pathum chu AICS-a assistant professor hna thawk mek an ni thung.
Nimin chawhnu inkhawmah BCM President-in Lalpa Zanriah Sakramen a buatsaih a, zan inkhawmah BCM president kal chhuak Rev. KV Thanga'n thuchah a sawi.
BCM ROREL DANG ṬHENKHAT
1. Mizorama eirûkna hluar lutuk tibo tura hmalak.
2. Ram pum huapin awmni khama ṭawngṭai.
3. BCM pum huapa khua leh tui ṭha leh nun dan mawi inzirtirna buatsaih.
4. Kum 2024-25 budget atan cheng nuai 12,566.63 an pawm a, chu'ng zinga nuai 8,481.42 chu kohhranin a thawh chhuah tur (church contribution) a ni.
5. BCM hnuaia zirna-in hrang hrang - AICS, HATIM, BHSS, BES leh Christian Hospital-te dinhmun zir chian.
6. Zorinpui/Zochachhuahah guest house sak.
7. Kum 2025-26 aṭanga AICS-ah master of theology (Old Testament) zirna hawn.
8. New Education Policy mila Higher & Technical Institute, Mizoram (HATIM) kalpui.
9. Department hrang hranga contract-a thawk mek mi 45-te dahngheh.