KHAWTHLIR

KTP-in thisen pe

KṬP, Tuikual South Branch chuan March 9, Inrinni khan an kohhran hall-ah thisen pek huaihawtin, Synod Hospital tan thisen unit 28 an pe a, petute mipa 26 leh hmeichhia pahnih an ni.

MDC pariatte'n ZPM an zawm

Chakma Autonomous District Council (CADC)-a member of district council (MDC) pariat chuan ZPM party an zawm a, March 9, Inrinni khan ZPM Gen.Hqrs-a general secretary H Chhawntluanga'n ZPM-ah a lawm lut tih ZPM thuchhuah chuan a tarlang. CADC MDC-te ZPM party-a lawm luhna inkhawm hi Chawngtea ZPM pisaah neih a ni.

Wheelchair pe

AMC Ward-VIII corporator Christina Roluahpuii Sailo chuan March 9, Inrinni khan a ward chhung, Armed Veng South-a mite hnenah wheelchair a pe. Wheelchair hi AMC Property Tax Return aṭanga sum hmuh hmanga pek a ni.

Heroin man

Assam Rifles leh Mizoram Police chuan March 7, 2024 khan Zokhawthar Ṭiau leiah heroin gram 184 an man a, international market-ah cheng nuai 128 hû a ni. Heroin kawltu Sanghleithuama s/o Nopuma, Zokhawthar an man nghal bawk.

Ṭhelret zir chiang

Mizoram Rubber Society hruaitute chuan tun hnai khan Tripura-ah Tripura State CM's Rubber Mission kalphung te, ṭhelrêt hralhna man leh a kaihhnawih industry-te tlawhin an zir chiang. Mizoram Rubber Plantation Programme kal mekah Mizorama ṭhelrêt chíngtute'n a chi ṭha chauh an dawn theih nan hma an la a ni.