KHAWTHLIR

Aizawl District Election Officer chuan thuchhuah siamin, Facebook leh Whatsapp-ah tute emaw dan loa Voter ID siam thei anga insawi an awm tih hriat a nih thu a tarlang a, "Hei hi Election department-in a hriatpui lo. Election Commission of India in EROnet hman phalna a pek ERO-te chauhin EPIC hi print tur a ni. Hemi chungchangah hian mipuite fimkhur turin kan in ngen e," a ti.

Hrangbana College NSS chuan nimin khan Aizawl Civil Hospital tan thisen unit 29 an pe a, a petute mipa 21 leh hmeichhia pariat an ni.

SIRDPR chuan Kolasib-a an Extention Training Centre-ah nimin khan village council thlan tharte tan VC inkaihhruaina dan, thuneihna leh pisa enkawl dan zirna an buatsaih a, bawrhsap Dr H Lalthlangliana'n a hmanpui. Training hi ni hnih awh tur a ni a, Kolasib district-a VC president, treasurer leh secretary-te an tel a ni.

Assistant Registrar Cooperative Societies (ARCS), Mamit district leh West Phaileng Farming Cooperative Societies Ltd. chuan nimin khan West Phailengah Pradhan Mantri Vandhan Yojana (Vandhan Mission) chungchang, thlai chìn dan leh a enkawl dan loneitute an zirtir. 

Champhai DC Maria CT Zuali chuan ran khuahkhirhna thupek chhuahin, an district chhungah ran - a neitu venna tel loa anmahnia chhuah tir/tlat tir leh vantlang hmun emaw midang rama chhuah a khap a, mahni ran vulhin khawlai emaw, vantlang hmun a ti bawlhhlawh a nih chuan a neituten an thianfai tur a nih thu a tarlang.

Mizorama dedicated covid hospital - State Referral Hospital (ZMC)-ah Covid-19 vei vanga enkawl chu mi pariat chiah an ni ta a; nimin khan hmeichhe tleirawl kum 13 mi chhuahtir a ni. SRH-ZMC Bulletin tarlan danin, enkawl mek mi pariatte chu mipa panga leh hmeichhia pathum, kum 29-56 inkar an ni a, an zinga pathum chu ICU-a enkawl ni mah se, ngaituahawm an ni lo.