Tuikual lui kama kawng siam tur enfiah

Minister of state Lalnghinglova Hmar chuan March 9, Inrinni zing khan a bial, Aizawl West-II chhunga Tuikual lui kam zuia kawngpui siamna tur, Aizawl West Outlet Project hmunhma an enfiah a, Tuikual thlanmuala Jubilee Rûnah hmalak zel dan tur an sawiho nghal.

Aizawl West Outlet Project atan hian Special Assistance to States for Capital Investment (SASCI) aṭanga sum hmuh cheng vbc. 20 ruahman a ni a, sum hi UDPA department chuan a pe chhuak tawh a ni.

Lalnghinglova Hmar chuan, hna ṭha leh chhenfâkawm a duh ber thu sawiin, project hlawhtlin nan party politics rilru dah bo a, inlungruala theihtawp chhuah turin khawtlang hruaitute a chah a; department hotute pawhin theihtawp an chhuah tur thu a sawi.

Minister chuan, Tuikual lui kama lirthei kal theihna kawngpui siam chu hun rei tawh tak aṭanga Aizawl West-II mipui beisei a nih thu sawiin, "Kawtkai chhuahna remchang leh hnai a ni dawn a, rîkrum thil, chhiatni ṭhatni, faina leh hriselna, bawlhhlawh sâwngbâwl leh ni tin khawsaknaah mipui tan a ṭangkai dawn hle. Hlawhtling taka siam zawh a nih chuan khawpui traffic jam-in a ziaawm phah thei dawn a ni," a ti.

Hmalak zel dan tur sawihonaah, kawngpui kalna tur detail survey neih thuai an rêl a; Dinthar veng huam chhung lui kama ram neitute’n kawngpui siam nan an ram chin eng emaw zat an pe chu lawmawm an tih thu an tarlang. Tuikual lui kam lehlama Assam Rifles ram chin hre chiang turin Land Revenue & Settlement department hotute thawhpui ni se, a ṭul chuan AR hotute nen pawh a hmuna enfiah ni se, an ti bawk.

UDPA director Dr Andrew H Vanlaldika chuan, Tuikual lui kam zuia kawng siam turah survey neih vat tum a nih thu a sawi.