Silchar-ah Chapchar Kût hmang

YMA, Silchar Branch leh Silchar Mizo Welfare chuan March 9, Inrinni khan Mission Compound-ah Chapchar Kût an hmang a, Central YMA president Lalhmachhuana'n kût pa niin a hmanpui.

Central YMA President chuan, mi dangte tana inpeknain tlawmngaihna a tipar vul tih sawiin, "Kan Zo nun ze mawi tlawmngaihna a tilang fiah ṭhin," a ti.

Hnam dang hmuha zahawm taka awmin Mizo hnam a chawi sang tih sawiin Lalhmachhuana chuan, "Hnam dang kara khawsate'n nun zahawm leh dik neih kan tum tlat a, nun kan vawn uluk a, zahawmna kan vawn tlat chuan hnam dangte'n min zuam ngai lo ang," a ti a; hnam dang lakah rinawmna tilang zel turin Silchar-a Mizo awmte a chah.

CYMA President chuan, Zo hnahthlakte chu inla hrang tham an awm lo tih sawiin, "Hnam péng leh bil tê têa inti hrang loin, Mizoah hian inchhûng khawm mai ila, kan zahawmna tur a ni. YMA hruaitute'n Zo hnahthlak inpumkhat zawnga hma kan lak zel a ṭul tak zet," a ti.

Silchar Mizoram House-a deputy resident commissioner S Kaptluanga chuan, Silchar Mizoram House chu Mizote inpui leh buaina leh harsatna tâwkte tlân khawmna a nih avangin a pawimawh hle tih a sawi a, "Chutihrualin a building hi siamṭhat a ngai tawh viau," a ti a; Mizoram House thawm ṭhat a nih theih nan hma la turin CYMA hruaitute a ngen.

Silchar-a Chapchar Kût hman­naah hian CYMA Com­mittee mem­ber pariat leh CYMA Zaipawl pawh an tel a ni.