Siahaah Lyuva Khutla hman a ni

Mara kût ropui leh ngahihlut ber, Lyuva Khutla chu March 8, 2024 khan Siaha District Playground-ah hlim taka hman a ni a, Burmese American Community Institute (BACI) MPA executive director Elaisa Vahnie leh district bawrhsap Lalhmunsanga Hnamte ten an hmanpui.

Lyuva Khutla hi Mara Autonomous District Council (MADC) bultuma hman a ni a; hnam incheina hrang hrang, hnam làm, zai, hnam ziaráng tilang thei ennawmte entir a ni. Lyuva Khutla chhivaw (miss) leh khydi (mister) thlan a ni bawk.

Siaha DC Lalhmunsanga Hnamte chuan, hnam ziaráng leh tih dan phung vawn nun kawngah Mara hnam chu entawn tlak a tih thu a sawi a, "Hnam ziaráng vawng nung zel turin ṭhangtharte'n rilru i sêng ang u. Tunlaiah ṭhalaite ruihhlo lakah an fihlim tawh lo hle a, damdawi hman sual a hlaur hle. Tun hnaiah chêng tam tak hû damdawi man a nih bakah, poppy chìnna hmunte a lo awm reng tih han hriat hian, ruihhlo donaah hmalak a ngaihzia a tichiang hle," a ti.

Mara hnam hian kût pali - Lyuva Khutla, Ladawhdai, Khonakia leh Lang­nechhe te an nei a; Lyuva Khutla hi an ngaihhlut ber a ni.