Tribal Artisan Empanelment Mela buatsaih

Tribal Cooperative Marketing Development Federation of India Ltd. (TRIFED) leh Champhai DC Office chuan March 9, Inrinni khan Champhaia Vanlallawma Indoor Stadium-ah Tribal Artisan Empanelment Mela an buatsaih.

Tribal Artisan Empanelment Mela-ah hian Champhai district-a mahni kutkawiha thil siam ṭhin mi 31 an tel a, an thil siamte an pho chhuak. TRIFED hotute leh an thawhpui North Eastern Handicrafts & Handlooms Development Corporation Limited (NEHHDC) aiawhte'n thil pho chhuahte chu TRIFED guidelines zûlzuiin an endik.

Tualchhunga thil siamtute chu TRIFED chuan empanelment neihpuiin, ṭha an tihte chu endik zui atan an lei a, chu'ngte chu PSP Committee, Guwahati-ah zir chian atan leh a ṭul anga bawhzui turin an thlen dawn a ni. Tihhmasawn ngaihna hrang hrangah inzirtirna an la buatsaih dawn a, thil siam chhuahte chu zau zawk leh tam tham zawka zawrh chhuah a nih theih nan kawng an dap dawn bawk.

Champhai SDO (Sadar) Manesia Khaimeichho chuan Mela buatsaih a nih chhan leh a kalphungte a sawifiah. Tribal Artisan Empanelment Mela-in a tum ber chu - hmun kilkhâwr zawka tribal mite'n an kutkawih themthiamna hmanga thil an siamte pho chhuahna remchang siamsak leh eizawnna atan an hman theih nana hmalakpui a ni.